حتـــــــــــة طيـــــــــــــنمين أنا مين !؟؟
مين أنا غير حتة طين
حتة طين ولا ليها قيمة
كانت مرمية في عالم مسكين
لكن من عُلاك بصيت وحنّيت
ونزلت ومسكت حتة الطين بإيديك
وهو فيه حد بيهتم بالطين !؟؟
ده آآآخره ندوس عليه بالرجلين
لكن إنت عينيك غير كل العينين
قدرت تشوف قيمة للطين
وإدتني من وقتك وجهدك كتير
وحطيتني على دولاب كان بالنسبالي كبير
وقعدت تشكّل وتبص عليا من نواحي كتير
ولا رضيت معايا أبداً بأقل القليل
ولأجل ما تشكلني إتعاصت إيديك
وشلت وَحَلي وعَبَلي
وما عليا غير ورميت بحملي كله عليك
لغاية ما عملت من حتة الطينة
أحلى وأجمل قنينـــــــــــــــــــــة
وعشان ما تثبت قُلت لازم تدخل الفرن
وحمّيت الحرارة وصحيح كانت الدنيا جمر
لكن مع كل لسعة كان جسمي يتشد ويمتن
ولا عدت أبُص لنفسي بنِفس مكسورة
بعد ما طِلعت من الفرن في أبهى وأجمل صورة
وطِلعت أسأل نفسي وأقول:
مين أنا مين !؟؟
مين أنا غير حتة طين
حتة طين ولا ليها قيمة
كانت مرمية في عالم مسكين
لكن من عُلاك بصيت وحنّيت
ونزلت ومسكت حتة الطين بإيديك
وأنا قيمتي صارت مش فيا
دي قيمتي بس في بصمات إيديك
viola sameh
